Á Seltjarnarnesi eigum við að geta boðið upp á framúrskarandi þjónustu. Við erum lítið samfélag þar sem boðleiðir eru stuttar og tækifærin til að skara fram úr ættu að vera augljós. Þrátt fyrir það virðist raunveruleikinn í stjórnun leikskólamála hjá bæjarfulltrúum meiri hlutans einkennast af sífelldri óvissu og viðbragðsstjórnun frekar en skýrri framtíðarsýn. Svo segir í grein Áslaugar Evu Björnsdóttur sem birt var í Nespóstinum þann 1. maí síðastliðinn. Áslaug heldur áfram: „Nú blasir við fyrirsjáanleg staða sem bæjaryfirvöld hefðu átt að undirbúa fyrir löngu. Foreldrar barna fædd árin 2021, 2022, 2024 og 2025 standa frammi fyrir ákvarðanatöku og skipulagsleysi sem virðast fremur vera neyðarráðstafanir á elleftu stundu heldur en vel ígrundaðar ákvarðanir teknar með hagsmuni yngstu kynslóðarinar að leiðarljósi“.
Þegar „lausnirnar“ skerða gæðin
Samkvæmt aðalnámskrá á leikskólalóð að vera námsrými sem hvetur til leiks og rannsókna. Undanfarin tvö ár hefur elsti árgangurinn dvalið á Stjörnubrekku við hlið Mýrarhúsaskóla þar hafa þau fengið að vera nálægt grunnskólanum í heilt ár, fylgst með krökkunum leika sér úti og getað séð fyrir sér hvað bíður þeirra þegar þau hefja skólagöngu. Þetta hefur gengið vel þrátt fyrir mjög takmarkandi leikskólalóð, börn og kennarar hafa verið dugleg í vettvangsferðum. Næsta haust á hins vegar að flytja þriggja til fjögurra ára börn (árgang 2022) á Stjörnubrekku. Þar er útiaðstaðan hvorki viðunandi né hönnuð fyrir þennan aldurshóp. Þessi börn eru of ung til að nýta vettvangsferðir í sama mæli og elstu börnin hafa gert til að bæta upp fyrir fábreytta leikskólalóð.
Ástæða þessa tilflutnings er sú að árgangur 2021 er stór og þarf fjórar deildir, en Stjörnubrekka rúmar aðeins þrjár. Þetta eru ekki nýjar upplýsingar fyrir meiri hluta bæjarstjórnar, stærð árgangsins hefur legið fyrir í mörg ár. Samt er brugðist við með því að skerða lífsgæði yngri barna.
Stöðugt viðbragð er bruðl með skattfé
Vegna plássleysis á Leikskóla Seltjarnarness er nú byrjað að bjóða börnum fæddum seinni hluta árs 2024 pláss á ungbarnaleikskólanum, börn sem nú eru að verða 2 ára og ættu að vera að flytjast af ungbarnaleikskóla yfir á aðrar deildir Leikskóla Seltjarnarness. Þetta þýðir að húsnæði sem hannað er fyrir minnstu börnin þarf enn og aftur að ganga í gegnum breytingar.
Þetta er í fjórða skiptið á jafn mörgum árum sem hringlað er með starfsemina þar. Slík viðbragðsstjórnun er dýr og óhagkvæm. Afleiðingin er auk þess sú að inntaka barna fædd árið 2025 stöðvast nær algjörlega, ef fram fer sem horfir verður unnt að bjóða börnum fæddum í janúar á síðasta ári upp á leikskólapláss á þessu ári, eðlileg krafa væri að öll börn fædd fyrir sumar 2025 fengju pláss á ungbarnaleikskóla nú strax í haust.
Framúrskarandi bæjarfélag skilgreinir mælanleg markmið og horfir til lengri tíma en eins kjörtímabils. Það er óviðunandi að meiri hluti bæjarstjórnar virðist vera í stöðugri nauðvörn. Skipulag og undirbúningur er mun hagkvæmara en sífelld slökkvistörf
Milljarðaframkvæmd án áætlunar?
Það hillir loks undir nýja leikskólabyggingu sem á að bæta úr brýnni þörf. Það er fagnaðarefni að fá loksins húsnæði sem á að bjóða börnum og starfsfólki upp á verðskuldaða aðstöðu. En þar virðast sömu vandamálin vera uppi á teningnum, skortur á gagnsæi og framtíðarsýn. Þrátt fyrir að um sé að ræða dýra framkvæmd upp á 1,5 milljarð króna, sem fjármögnuð er að fullu með lánsfé, liggur engin skýr aðgerðaráætlun fyrir um starfsemina. Opinber framtíðarsýn og aðgerðaráætlun unnin í samvinnu við starfsfólk leikskólanna og foreldra í gegnum foreldrafélag er hreinlega ekki til staðar. Starfsfólkið, sem á að bera starfið uppi og foreldrar eru skildir eftir í óvissu. Það er ekki nóg að steypa upp veggi, það þarf að skipuleggja hvernig lífið innan þeirra á að fá að blómstra.
Raunverulegt samráð
Í litlu samfélagi á rekstur að vera gagnsær. Þegar breytingar eru boðaðar án kynningar og foreldrar fá engin svör um hvernig faglegum kröfum verði mætt á ófullkomnum leikskólalóðum, grefur það undan trausti, þegar kemur að börnunum okkar er ekkert mikilvægara en traust.
Seltjarnarnes hefur alla burði til að vera fyrirmynd annarra sveitarfélaga. Við höfum frábært starfsfólk og samheldinn íbúahóp. Til þess að skara fram úr þurfum við nýjan meirihluta sem þorir að skipuleggja til framtíðar, hlustar á endurgjöf og lítur á gagnrýni sem tækifæri til bóta.
Við eigum ekki að þurfa að herma eftir öðrum eða flytja inn hitt eða þetta “módel”. Við eigum að finna leiðir sem henta okkur og tryggja að börnin okkar alist upp í öruggu og hvetjandi umhverfi. Það krefst framsýni og skipulags, ekki skipulagsleysis og stöðugs viðbragðs.
Áslaug Eva Björnsdóttir
Höfundur er móðir tveggja barna og skipar sjötta sæti á lista Samfylkingar, Viðreisnar og óháðra á Seltjarnarnesi.